Cantus Troili - by Geoffrey Chaucer
"If no love is, O God, what fele I so?
And if love is, what thing and whiche is he?
If love be good, from whennes comth my wo?
If it be wikke, a wonder thinketh me,
When every torment and adversitee
that cometh of him, may to me savory thinke;
for ay thurst I, the more that I it drinke.
"And if that at myn owene lust I brenne,
Fro whennes cometh my wailing and my pleynte?
If harme agree me, wher-to pleyne I thenne?
I noot, ne why unwery that I faynte.
O quike deeth, o swete harm so queynte,
How may of thee in me swich quantitee,
But if that I consente that it be?
"And if that I consente, I wrontfully
Compleyne, y-wis; thus possed to and fro,
Al sterelees withinne a boot am I
Amid the see, bytwixen windes two,
That in contrarie stonden evermo.
Allas! what is this wonder maladye?
For hete of cold, for cold of hete, I dye."
Blogwind 
